A Xunta renova o convenio con Alcer para o traslado de pacientes renais en Lugo
O Consello da Xunta deu luz verde á sinatura dun novo acordo de colaboración entre o Servizo Galego de Saúde (Sergas) e a Asociación de Enfermos Renais (Alcer) co obxectivo de garantir o transporte das persoas que padecen insuficiencia renal crónica ata os centros de hemodiálise na provincia de Lugo.
O propósito deste convenio é facilitar os desprazamentos dos pacientes dentro do sistema sanitario público na área sanitaria de Lugo, A Mariña e Monforte de Lemos. Para iso, o Goberno galego destinará un investimento de 672.880 euros que permitirá manter este servizo operativo.
O acordo terá unha vixencia dun ano desde a súa formalización e poderá ser renovado anualmente ata un máximo de tres anos.
A Asociación Alcer traballa para mellorar a calidade de vida das persoas con enfermidades renais na provincia de Lugo, ocupándose, entre outras funcións, de xestionar os traslados dos pacientes ata os hospitais e clínicas onde reciben tratamento de hemodiálise.
Grazas a esta colaboración, os usuarios que necesiten acudir aos distintos centros sanitarios da provincia para someterse ás súas sesións de hemodiálise poderán ser transportados en taxi ou, no caso de que o seu estado de saúde o requira, en ambulancia.
Segundo os datos recollidos en 2023, este servizo sanitario facilitou o traslado dunha media de 161 pacientes ao mes, cubrindo 53 rutas e percorrendo aproximadamente 67.741 quilómetros cada 30 días.