Abraham Pinto Mendoza gaña o XXIII Certame de Pintura Rápida de Lugo
![primeiro premio certame pintura rapida lugo](https://lugoxa.com/wp-content/uploads/2023/07/primeiro-premio-certame-pintura-rapida-lugo.jpg)
Durante o día de onte celebrouse a XXIII edición do Certame de Pintura Rápida ao Aire Libre Cidade de Lugo. A riqueza patrimonial sumou un ano máis atractivos coa presenza de 35 artistas nas rúas da cidade, procedentes de distintas zonas de Galiza e do resto do Estado, que inmortalizaron os distintos lugares da cidade en cadros con variados estilos e técnicas pictóricas.
O xurado, composto polo representante da Escola de Arte e Deseño Ramón Falcón Cándido Díaz Mosquera, o muralista Rubén Paz e a artista plástica Fina Eiros García, escolleu como gañadores dos tres premios principais a Abraham Pinto Mendoza co 1º premio (1.600€ e diploma), Oniel Rodríguez López, co 2º premio (1.100€ e diploma) e Manuel Carballeira Rivas co 3º (900€ e diploma).
Os 5 accésit (300€ e diploma) foron para os seguintes participantes: Julio Gómez Mena, Benigno Rodríguez Sánchez, Fernándo Sánchez Ceballos, Óscar Herrán Míguez e Piedad Santamarina Pascual.
En canto ao premio para o artista local, dotado de 450€ e diploma, o xurado decidiu outorgarllo a Andrés Haensel.
A concelleira de Cultura, Maite Ferreiro, afirmou que o Certame de Pintura Rápida "contribúe a proxectar a riqueza patrimonial e cultural de Lugo, tanto entre os propios participantes, que chegan de todo o estado, como a través dos propios cadros, que recollen os recunchos máis fermosos da cidade". Ao acto foron convidadas integrantes de todos os grupos que compoñen a corporación municipal.