Abre o ecoparque de Campo Castelo, o primeiro deste tipo en Lugo
O municipio de Lugo conta dende onte co primeiro Ecoparque Urbano da cidade. Situado no Campo Castelo, a alcaldesa, Lara Méndez, poñíao a disposición da cidadanía esta mesma tarde.
A intervención, na que o Concello investiu 312.748 euros, tivo por obxecto a ampliación en máis 70 m² e a remodelación integral desta céntrica área de xogos para convertela nun novo espazo de lecer aberto e integrador en prol da convivencia interxeración e en harmonía coa contorna na que se atopa.
Para iso, optouse por unha solución arquitectónica que adaptou o espazo, rompendo co concepto de parque pechado que ofrecía ata o momento e permitindo, segundo subliñou a rexedora, “unha transición serena da renovada dotación pública cara a Praza Maior e o Concello, respectando os condicionantes da súa localización e mellorando a estética da zona PEPRI”.
Méndez fixo fincapé na identidade propia do recinto, que combina o eco – deseño con outros recursos urbanos, de esparexemento, visuais e paisaxísticos que axudaron a resolver os límites espaciais e favoreceron que a instalación pareza, no seu conxunto, unha extensión cara a Casa Consistorial e a Praza Maior, incrementando a súa funcionalidade dende un punto de vista inclusivo”, incidiu.
De feito - abondou a mandataria - “as escaleiras foron substituídas por ramplas, e os cerramentos, tanto deste parque como do recinto infantil próximo, son agora moito menos invasivos adoptando unha configuración de muro revestido que simula madeira e que exerce de banco para favorecer a socialización”.
Durante o acto de apertura, que se acompañou dunha chocolatada para as crianzas que estrearon o Ecoparque, Lara Méndez subliñou que a accesibilidade e a sostibilidade foron as dúas premisas transversais da actuación, xa que todo o mobiliario procede da reciclaxe de plásticos e conta cun certificado de baixa pegada de carbono, cumprindo así os obxectivos de desenvolvemento sustentable da Axenda 2030.
“Todos os xogos e o mobiliario do Parque Infantil de Campo Castelo teñen os selos ‘Made Green’: produtos feitos a base de materiais reciclados post-consumo (como residuos recuperados do océano, téxtiles usados, envases alimentarios, etc.) e ‘Born Green’, que obteñen aqueles produtos feitos do propio material de construción da natureza como a madeira, procedente de silvicultura sostible e, por tanto, pouco contaminantes”, lembrou.
Igualmente, todo o parque dispón agora dun pavimento de caucho continuo, con revestimento decorativo, respectuoso co medio ambiente e con propiedades antiescorregadizas e outras características técnicas que garanten unha longa durabilidade e boa resposta ao uso á intemperie.
En canto ao mobiliario urbano, o responsable de Transición Ecolóxica referiu que o parque está equipado con papeleiras elaboradas con residuos que de forma cotiá se desbotan ao lixo. “Ademais, foron recolocadas as arquetas existentes e incrementouse a iluminación para aumentar a súa versatilidade no inverno, substituíndo os dous farois por outros tres de maior eficiencia enerxética, en consonancia co resto de actuacións que o Executivo de Lara Méndez está a levar a cabo nos diferentes barrios da cidade en prol da súa humanización”, apuntou Miguel Fernández.