Abre o prazo do Programa de Activación á Transferencia de Coñecemento no Campus Terra
![Programa de Activacion a Transferencia de Conecemento CT(1)](https://lugoxa.com/wp-content/uploads/2023/08/Programa-de-Activacion-a-Transferencia-de-Conecemento-CT1.jpg)
As candidaturas de proxectos, que deben estar aliñados con eixos de investigación do Campus Terra da USC, poden ser remitidas ata o 11 de setembro.
A USC pon en marcha o Programa de Activación á Transferencia de Coñecemento no Campus Terra, unha iniciativa que procura contribuír ao desenvolvemento do tecido produtivo da súa contorna, transferindo á sociedade o coñecemento xerado mediante a colaboración con empresas e institucións co gallo de dar resposta a problemas que a sociedade percibe como relevantes.
Dirixida ao persoal investigador e grupos de investigación do Campus Terra, a convocatoria financiará proxectos con resultados de investigación que estean nunha fase de desenvolvemento e validación inicial (TRL 4 ou TRL 5) e que necesiten acceder a niveis avanzados de madureza tecnolóxica e acometer novas probas de concepto ou escalado.
As candidaturas presentadas disporán dende o primeiro momento co asesoramento do persoal técnico do Campus Terra e da AVTE para unha adecuada orientación das propostas. Cada un dos proxectos seleccionados polo programa contará cun financiamento máximo de 15.000 euros e co acompañamento do persoal técnico da USC no seguimento da execución das propostas así como na aplicación social e económica do coñecemento xerado por eles.
As solicitudes poden presentarse ata o 11 de setembro mediante o envío dunha ficha cos datos de cada proposta asinada pola persoa coordinadora do proxecto ao enderezo campus.terra@usc.es. Canda as bases do programa, a web do Campus Terra pon á disposición do persoal investigador unha guía para facilitar a participación na convocatoria.
Selección de propostas
O programa financiará proxectos de 3 a 8 meses de duración aliñados cos eixos de especialización do Campus Terra: Produción vexetal e agricultura sostible, Produción e saúde animal sustentables, Alimentación segura e saudable, Xestión forestal sostible, Novas tecnoloxías (TICs, ómicas, etc.), Cambio climático, Biodiversidade e infraestruturas verdes, Única saúde (Onehealth) e Historia e cultura do mundo rural.
As candidaturas deberán contar cunha cunha traxectoria previa de investigación que, a través do financiamento público ou privado de proxectos de I+D+i, teña xerado novo coñecemento, metodoloxías de traballo ou datos anovadores e con potencial de aplicación. Os proxectos terán que atoparse nunha fase de maduración tecnolóxica mínima equivalente ao TRL4 (validación de compoñente e/ou disposición del na contorna de laboratorio) ou TRL 5 (validación de compoñente e/ou disposición en contorna relevante).
Os criterios de avaliación de solicitudes terán en conta, entre outros parámetros, a coherencia e idoneidade das validacións propostas e da viabilidade técnica e económica para acadar os obxectivos no período de tempo establecido. Considerarán tamén a innovación respecto aos produtos ou servizos dispoñibles actualmente, o impacto social e económico das propostas, a adecuación e grao de compromiso das empresas ou entidades colaboradoras na transferencia de resultados de investigación e a súa capacidade para xogar un papel relevante no proceso, así como para aplicar as solucións acadadas. Ademais analizarán o grao de madureza dos resultados e a contribución da proposta aos ODS con atención á perspectiva de xénero.