ADEGA-Lugo rexeita a ocupación da zona de servidume do río Rato
A asociación ecoloxista ADEGA-Lugo manifestou a súa total oposición á ocupación da zona de servidume do río Rato, independentemente de que sexa unha afectación pequena.
A súa postura responde ao anuncio da Xunta de Galicia, a través da Axencia Galega de Infraestruturas (AXI), e do Concello de Lugo, que están a promover as obras de ensanche e mellora da Rúa Serra de Meira entre as rotondas da ponte de Paradai e a da Avenida Adolfo Suárez. ADEGA subliña que “as beiras do río deben protexerse e conservarse como espazo verde”.
Segundo o anuncio da Xunta, valoráronse varias propostas, e finalmente optouse por unha que implica a ocupación e alteración dunha zona inundable do río Rato, en detrimento doutra alternativa que non afectaba ningunha zona protexida.
Para ADEGA, a Xunta de Galicia non pode xustificar a ampliación da estrada mediante a redución do espazo do río, unicamente para conseguir unha obra máis recta e un aparcadoiro máis amplo. A organización alerta de que esta decisión pon en risco a seguridade das persoas e os seus bens en caso de inundación, ao alterar unha zona inundable.
ADEGA critica que a Xunta de Galicia non aprendeu das consecuencias que están a sufrir outros territorios como Valencia, Murcia, Andalucía ou Madrid, onde a urbanización de zonas inundables provocou graves problemas. A natureza demostra que estas zonas non deben ser ocupadas nin urbanizadas, polo que a asociación ecoloxista reitera a súa total oposición á ocupación da zona de inundabilidade, defendendo así a seguridade cidadá.
Ademais, ADEGA denuncia que con este proxecto a Xunta de Galicia volve demostrar a súa falta de preocupación polo medio ambiente e polos efectos do cambio climático nos próximos anos. Segundo a organización, a administración está a priorizar os intereses privados duns poucos en detrimento da seguridade da poboación e da protección do medio natural na zona de Paradai.
Por último, ADEGA-Lugo insta á Confederación Hidrográfica Miño-Sil a emitir informes correctores que garantan a preservación da zona de inundabilidade conforme á lexislación vixente. A organización asegura que tomará as medidas necesarias para protexer a zona inundable do río Rato no parque do Sagrado Corazón, como leva facendo ata agora, co obxectivo de manter os cursos fluviais en estado saudable.