Adega organiza este martes unha palestra sobre o val do Rato de Lugo
Dando continuidade ás actividades propostas dentro da Campaña Salvemos o pulmón verde de Lugo, a delegación de Lugo de Adega organiza para este martes 9 de maio a palestra Defender o val do Rato, preservar a nosa riqueza. O acto terá lugar no Salón de actos da UNED e dará comezo ás 19 horas.
Participarán Maricarmen Tapia Gómez, doutora en Urbanismo, investigadora da USC e directora da Revista Crítica Urbana, e Emilio Díaz Varela, profesor da USC, coordinador do grupo Planificación e Xestión en Sistemas Socio-Ecolóxicos Adaptativos Complexos - COMPASSES.
Nesta sesión analizarase dende unha perspectiva xeral o crecemento das cidades, tendencia que en moitos casos ameaza espazos naturais que aportan importantes servizos ecosistémicos aos sistemas urbanos e a sociedade en xeral, diminuíndo por tanto a calidade de vida das persoas e supoñendo un impacto para a biodiversidade.
A palestra será retransmitida en directo a través da canle de YouTube de Adega.
