Adxudicada a obra de mellora da rúa Pousadela
![Imaxe do encontro mantido hoxe pola rexedora coa veciñanza da rúa Pousadela](https://lugoxa.com/wp-content/uploads/2022/12/Imaxe-do-encontro-mantido-hoxe-pola-rexedora-coa-vecinanza-da-rua-Pousadela.jpg)
Alén da pavimentación da vía, a intervención contempla a creación dun pequeno treito de beirarrúa que dará servizo na zona de maior concentración residencial. A renovación da iluminación e a creación de 6 novos puntos de luz son outras das melloras incluídas ás que se suma unha pequena humanización ao pé da pasarela Tanxurela.
O Concello de Lugo adxudica hoxe os traballos de acondicionamento e conservación da rúa Pousadela. Unha actuación, enmarcada na Estratexia Dusi–Muramiñae, que pretende seguir avanzando na unión da trama urbana co río.
O contrato, que se outorgará á empresa Construcciones Sanle, disporá dun orzamento de 118.236 euros, cos que a Admininstración local procederá a renovar a rúa Pousadela que comunica a Rolda do Carme co barrio da Cheda e, á súa vez, coa Avenida dos Deportes ao seu paso baixo a estrada N - VI onde o Executivo local construíu recentemente a pasarela peonil Tanxurela para mellorar os accesos coa contorna fluvial.
Méndez, que o pasado decembro mantivo un encontro coa veciñanza da zona para explicarlle o alcance das actuacións planificadas lembrou que o principal obxectivo das mesmas é dotar esta vía dos elementos necesarios que posibilitarán o seu mellor aproveitamento e utilización, incluíndo a renovación en LED dos puntos de luz e a creación doutros novos, en clave de seguridade e perspectiva de xénero.
A alcaldesa clarificou que a integración deste tramo nunha unidade de actuación que está sin desenvolver condicionou o calado da obra “xa que só podemos mellorala pero non ampliala, tal e como nos gustaría”, incidiu.
En total, a superficie a renovar se concentra nos últimos 282 metros, é dicir, na metade Sur da rúa Pousadela que, actualmente, se atopa en pavimento terrizo, típico de camiños rurais.
Procederase á pavimentación deste treito que se delimitou en tres seccións, segundo os traballos previstos. Por unha banda, dende o entroncamento coa Avenida dos Deportes e ata a intersección con Río Eume se executará un novo firme de formigón para regularizar o terreo coa finalidade de que peóns e vehículos convivan de forma segura e cómoda. A maiores, no cruzamento de Pousadela con Río Masma existe outra área na que tamén se aplicará o firme de formigón para adaptala, tratando de que a superficie concorde o máximo posible en todo o ámbito. E, finalmente, o tramo de conexión da vía que une Río Eume e Río Landro e que xa está dotado con rega asfáltica será renovado debido ao deterioro que presenta ante o elevado tráfico rodado que soporta.
Lara Méndez tamén fixo fincapé en que as obras incluirán a humanización dunha illa verde de escasas dimensións situada á beira da Tanxurela.
“Trátase dunha pequena área que contén unha arqueta e que, como particularidade, está afectada por unha gran pendente transversal que afea todo o enclave. Por este motivo, realizaremos unha achega vexetal e a plantación dun arbusto co que, alén de mellorar a estética do emprazamento, se evitará o paso de viandantes”, engadiu a alcaldesa.
Debido a que entre Río Eume e Río Landro se interrompe a conexión peonil, o Concello ten previsto adecuar este espazo cunha roza profunda e o perfilado dos noiros, evitando que a escorrentía poida afectar ás edificacións ao tempo que cubrirá cunha capa de canto rodado a franxa máis próxima ás vivendas para permitir a circulación de transeúntes. Tamén se contempla a creación dun pequeno treito de beirarrúa que dará servizo na zona de maior concentración residencial.
Nos doce metros anteriores á intersección entre a rúa Pousadela e a Avenida dos Deportes levarase a cabo a instalación dunha fila de separadores, que irán fixados á cimentación soterrada, cos que se pretende dotar de maior protección tanto a vehículos como ás persoas fronte a saídas de vía e evitar o tránsito involuntario por un predio privado que non está adaptado a tal uso. Igualmente, daremos continuidade á rede de iluminación pública renovando a xa existente con LEDs de baixo consumo e instalando 6 novos puntos de luz que, alén de redundar no aforro enerxético, reducirán a sensación de inseguridade.