Adxudicado o contrato de rehabilitación da cuberta do Pazo dos Deportes
A Xunta de Goberno da Deputación de Lugo aproba a adxudicación do contrato de rehabilitación da cuberta do Pazo dos Deportes, cun investimento total de 608.000 euros, a maior inversión realizada nesta instalación nos últimos anos.
O contrato divídese en dous lotes: a reparación das cubertas inclinadas, adxudicada á empresa Soluciones Solurban SL, e a intervención nas cubertas planas, concedida a Anllar Mantenimientos y Construcciones SL. Os traballos, que terán unha duración de catro meses, incluirán a impermeabilización dos 8.500 metros cadrados da cuberta con membrana de poliurea, ademais da limpeza, recolocación e selado das chapas e paneis da envolvente. Tamén se reforzará a evacuación de augas pluviais, renovando os entronques coas baixantes e incrementando o número de baixantes e aliviadoiros.
O vicepresidente da Deputación, Efrén Castro, subliñou que "nas vindeiras semanas realizaranse os trámites necesarios para formalizar os contratos e iniciar as obras, garantindo a compatibilidade dos traballos co uso do Pazo por parte de Breogán e Ensino".
As empresas adxudicatarias dispoñen agora dun prazo de cinco días para presentar a documentación requirida antes de proceder á sinatura dos contratos e o inicio das obras.
600.000 euros en axudas para clubs deportivos
Ademais, a Xunta de Goberno aprobou as bases da convocatoria de axudas para clubs e entidades deportivas, cun orzamento total de 600.000 euros. Esta iniciativa busca fomentar o deporte e a actividade física a través do apoio ás entidades deportivas da provincia.
Entre os criterios de concesión das axudas valórase a incidencia social do club, o rendemento deportivo, o ámbito territorial (primando os clubs de concellos con menos de 2.000 habitantes), a antigüedade da entidade e o persoal co que conta. Tamén se potenciarán aspectos transversais como o fomento do deporte feminino e a inclusión.
Nesta convocatoria, o importe máximo das axudas ascenderá a 6.000 euros por entidade, fronte aos 5.000 euros de anos anteriores. As bases e os modelos de solicitude estarán dispoñibles na web da Deputación de Lugo e serán publicadas no Boletín Oficial da Provincia nos próximos días, momento no que se abrirá o prazo para a presentación de solicitudes.