Adxudicados máis de 400.000 euros para o abastecemento e saneamento da auga en Lugo
Adxudicado o contrato do novo servizo de reparacións e apoio técnico para as redes de abastecemento e saneamento de auga de Lugo, que contará cun orzamento anual de 423.500 euros.
O contrato busca optimizar o mantemento destas infraestruturas esenciais, garantindo unha resposta eficaz e continuada ante calquera incidencia.
O novo servizo permitirá atender as avarías fóra do horario habitual da brigada de augas, reforzando o operativo activado nos últimos meses.
A empresa Gestagua será a encargada de prestar este servizo, que terá unha duración inicial dun ano, prorrogable por outro adicional.
O contrato inclúe unha distribución orzamentaria de 302.500 euros anuais para a rede de abastecemento e 121.000 euros para a de saneamento. Ademais, a nova contratación permitirá reforzar o mantemento preventivo e correctivo, anticipándose a posibles problemas e reducindo tempos de resposta ante emerxencias.