Alba Rey e Marcos Pascual destacaron nunha das probas oficiais do ranking galego de trailrunning
O Club Deportivo Biosbardo celebra unha fin de semana inesquecible, sumando éxitos tanto a nivel competitivo como na representación na Selección Galega de Trail.
Os atletas do CD Biosbardo desprazáronse ata Muros para disputar unha das probas oficiais do ranking galego de trailrunning, unha cita multitudinaria con máis de 1100 corredores e que, ademais, pechaba o proceso de selección para o combinado autonómico.
Alba Rey protagonizou unha actuación excepcional, acadando a vitoria absoluta feminina, xa que tras un inicio controlado, a atleta impuxo o seu ritmo na primeira subida e xa non abandonou o liderado ata cruzar a liña de meta en primeira posición. Con este triunfo, Alba suma a máxima puntuación para o ranking galego da Federación Galega de Atletismo.
Na categoría masculina, Marcos Pascual acadou unha meritoria terceira posición absoluta. A pesar de que o trazado rápido da proba non favorecía as súa cualidades, Marcos logrou manterse na loita polo podio durante os últimos dez quilómetros, distanciándose dos seus perseguidores nos dous quilómetros finais para colgarse a medalla de bronce.
Tres convocados na Selección Galega Absoluta
Ademais, a Federación Galega de Atletismo vén de facer oficial a lista de convocados para o Campionato de España por Seleccións, que se disputará a próxima semana, e o CD Biosbardo conta cunha representación destacada: Federico Losada Conde, Marcos Pascual Fidalgo e Tamara García Rodríguez.
O club achega tres dos dez integrantes da selección absoluta, un 30 % do equipo galego, demostrando a calidade dos seus deportistas.
Ademais, Iván Sangiao Darriba, membro do CD Biosbardo, é o máximo responsable federativo da modalidade e dirixirá a expedición galega no campionato, formando parte do equipo de traballo da RFEA.
O CD Biosbardo reafirma así o seu papel de referencia no trail galego, sumando éxitos e consolidando a súa presenza na elite autonómica e nacional.