ALCER Lugo destaca a atención a 100 persoas con enfermidade renal crónica no seu programa integral de apoio
ALCER Lugo puxo en valor o labor realizado desde xuño de 2025 no marco do seu programa de Atención Social e Física na enfermidade renal, unha iniciativa coa que xa atenderon un total de cen persoas con Enfermidade Renal Crónica na provincia. A entidade subliña que se trata dun colectivo especialmente vulnerable que precisa un acompañamento continuado e adaptado ás súas necesidades.
O proxecto, presentado a través da Confederación Española de Persoas con Discapacidade Física e Orgánica (COCEMFE), aposta por unha intervención integral e interdisciplinar que combina o traballo social coa terapia ocupacional. Este enfoque permite abordar tanto a realidade social e emocional das persoas afectadas como as súas limitacións físicas, favorecendo a súa autonomía e mellorando o día a día.
Desde o ámbito social, o equipo analiza a situación socioeconómica e persoal dos pacientes, identifica factores de risco e facilita o acceso a recursos sanitarios e comunitarios. Ademais, foméntase a inclusión mediante grupos de apoio e redes de proximidade que contribúen a reducir o impacto psicolóxico da enfermidade.
Paralelamente, o servizo de Terapia Ocupacional céntrase na rehabilitación física e funcional mediante programas adaptados, exercicio dirixido, adestramento en habilidades motrices e adaptación do contorno para minimizar as limitacións derivadas da ERC. O persoal realiza visitas periódicas ás unidades de hemodiálise da provincia, co fin de facer un seguimento continuo da evolución das persoas usuarias, e impulsa talleres formativos dirixidos tanto ás persoas afectadas como ás súas familias.
O programa mantén como eixe central unha intervención global que promove o benestar emocional, o apoio comunitario, a mellora da autonomía e a calidade de vida das persoas con enfermidade renal. A entidade dispón tamén dun servizo de atención nutricional e psicolóxica durante todo o ano, ademais de desenvolver campañas de prevención e de fomento da doazón de órganos.
Esta iniciativa intégrase no Plan de Prioridades de COCEMFE e conta co apoio da Fundación ONCE, un respaldo que permite consolidar un servizo especializado, próximo e continuado para a poboación con Enfermidade Renal Crónica na provincia de Lugo.