Álex Carbonell deixa de ser xogador do Club Deportivo Lugo
O Club Deportivo Lugo e Álex Carbonell acordaron dar por finalizada a relación contractual que unía a ambas partes despois de cinco meses no equipo da cidade amurallada. A entidade albivermella fixo público o acordo, polo que o futbolista deixa de formar parte do cadro lucense.
Desde o CD Lugo agradeceron a Álex Carbonell o seu traballo, profesionalidade e compromiso durante o tempo no que defendeu a camiseta albivermella, ao tempo que lle desexaron a maior das sortes no seu futuro, tanto no ámbito deportivo como no persoal.
Carbonell formouse na canteira do FC Barcelona e conta cunha ampla traxectoria tanto no fútbol nacional como no internacional. Ao longo da súa carreira pasou por equipos como o Barça Atlètic, o CF Reus, o Celta B, a SD Amorebieta ou o Córdoba CF, acumulando experiencia en diferentes categorías do fútbol español.
Nos últimos anos, o centrocampista continuou a súa progresión na Eredivisie, a primeira división dos Países Baixos, onde militou no Fortuna Sittard e no Almere City, club co que competiu na tempada 2024/25. Precisamente no Almere City compartiu vestiario co tamén xogador do CD Lugo Álex Balboa.