Amigos do Patrimonio de Castroverde organiza unha visita guiada aos fornos do cal
A asociación Amigos do Patrimonio de Castroverde organiza para o sábado 14 de febreiro unha visita aos fornos do cal do municipio, unha actividade que pretende poñer en valor este elemento singular do patrimonio galego vinculado á construción tradicional.
A xornada dará comezo ás 10:00 horas coa saída desde a praza de Castroverde, desde onde se realizará un percorrido polos fornos do cal situados en Bolaño, Serés, Castedo, A Meda, Outeiro e Silvaldes. Tras a visita, ás 14:00 horas, está previsto un xantar para as persoas participantes.
Xa pola tarde, ás 16:00 horas, o Centro Sociocultural Paco Pestana acollerá unha conferencia a cargo de dona María Teresa Gómez Morgade, que levará por título Patrimonio galego de terra e cal, na que se abordará a importancia destes materiais e técnicas na arquitectura tradicional de Galicia.
Desde a organización lembran que é necesario comunicar a asistencia antes do día 9 de febreiro, tanto por cuestións de loxística do autobús como polo xantar. Así mesmo, recoméndase acudir con calzado axeitado que permita achegarse sen dificultade aos lugares nos que se atopan os fornos.