Ana Corredoira presenta a lista do PSOE de Palas de Rei
![PRESENTACION CANDIDATURA PSOE PALAS DE REI](https://lugoxa.com/wp-content/uploads/2023/04/PRESENTACION-CANDIDATURA-PSOE-PALAS-DE-REI.jpg)
A candidata socialista de Palas de Rei, Ana Corredoira, presentou a súa candidatura para as vindeiras municipais. Este gandeira e bióloga, dedicada á produción de leite ecolóxico á fronte da granxa A Cernada, lidera por primeira vez o proxecto do PSdeG neste concello de cara á convocatoria electoral do 28 de maio.
A Casa da Cultura de Palas acolleu o acto, no que participaron a Secretaria de Organización provincial, Pilar García Porto, e o Voceiro do PSdeG no Parlamento de Galicia, Luis Álvarez, así como cargos orgánicos e militantes do Partido.
Pilar García Porto subliñou que “a súa formación, traxectoria e proxección” fan de Ana Corredoira “unha candidata con capacidade gañadora para darlle a Palas de Rei o impulso que precisa”. Ademais destacou a “defensa e o compromiso co rural que vén demostrando dende hai moito tempo”.
A Secretaria de Organización provincial asegurou así mesmo que a candidata socialista é o reflexo “da forza, do dinamismo e da capacidade do Partido Socialista para ilusionar e atraer a persoas con talento e gran proxección”.
Ana Corredoira ten 33 anos de idade. Como ela mesma se define, é bióloga de formación e gandeira de profesión e vocación, dedicándose a produción de leite ecolóxico na Cernada, onde está a finca familiar. Medrou en Palas e sempre estivo vinculada ao rural e ao sector primario, implicándose activamente na defensa deste territorio, das súas posibilidades e da construción do seu futuro. Colabora activamente en programas e medios de comunicación tanto a nivel nacional como local, contando as súas experiencias vitais arredor do seu traballo.
Buscar a cohesión social
A candidata do PSdeG reivindica outro de xeito de facer política en Palas de Rei “defendendo o territorio e apoiando ao medio rural”. Sinala que lidera esta lista electoral “consciente das eivas e necesidades deste municipio que experimento eu mesma a diario, así como da importancia de vertebrar cada proposta arredor das veciñas e veciños e de buscar de novo a convivencia e a cohesión social a través do traballo colaborativo”.
Explicou ademais que nesta andaina está acompañada “por un equipo de veciñas e veciños comprometidos, preparados e ilusionados para traballar activamente polo futuro de Palas de Rei. Persoas que, coma min, carecen de intereses políticos mais aló do obxectivo de mellorar e traballar a prol do municipio”.
Políticas sociais, cultura, infraestruturas, estradas e vivenda
No que se refire ao programa electoral, Ana Corredoira aposta por unha Administración local transparente e por reforzar as políticas sociais, “coa premisa de estar máis preto das persoas”. Puntualiza ademais que este proxecto progresista en Palas de Rei “comeza cunha mención moi significativa cara o reto demográfico como eixo de traballo nas políticas públicas do noso Concello”.
No eido cultural destaca “un plan de cultura en movemento polas parroquias e un Proxecto de Biblioteca Municipal que inclúa actividades lúdicas e culturais”. Tamén propón a Creación dun Padroado Municipal de Cultura, Turismo e Deporte, “unha estrutura que, contando cos axentes e entidades implicadas, poida desenvolver os plans estratéxicos neste eidos que nos permitan poñer en valor a nosa vila, o noso rural, a nosa cultura e o noso patrimonio”, afirmou.
Sobre as melloras das infraestruturas e dotacións públicas no concello de Palas de Rei propón a “humanización da vila e dos espazos públicos e a revisión da accesibilidade e as zonas verdes”, así como “a rehabilitación e mantemento dos edificios e instalación públicas”. Sinala que “urxe atender a rede pública de abastecemento de auga, acondicionada e preparada para soportar a demanda actual da vila, e mellorar a rede de saneamento e a xestión de reciclaxe de residuos”.
En cando á rehabilitación e mantemento das vías municipais, Corredoira propón “un plan estratéxico que contemple a rehabilitación de todas as estradas que percorren o noso municipio”. “Esta medida é fundamental para posibilitar a vida e o desenvolvemento dunha actividade económica na aldea”, remarcou.
No que atinxe á vivenda, “é unha das problemáticas actuais” no concello, polo que plantexa “un plan público que revise esta realidade e, co apoio dos axentes implicados, desenvolva a súa capacidade mediadora”. Outra proposta é un plan de promoción de emprego “prestando unha atención especial ao desenvolvemento empresarial e, especialmente, ao ecosistema do emprendemento innovador”.
Candidatura do PSdeG ás eleccións municipais de Palas de Rei
A candidatura socialista de Palas de Rei está composta polos seguintes candidatos e candidatas:
- Ana María Corredoira Vázquez
- Ángela Pérez Vázquez
- José Manuel García Miguélez
- Teresa Castiñeira Vizcaíno
- Miguel Ángel Rivera Barral
- Aida Sánchez Expósito
- Pablo Sánchez Arias
- Juan Bautista Rodríguez Santiso
- Rosana Pacín Vázquez
- Isabel Cea Cea
- José Antonio Blanco Rouco
Suplentes: Pedro González Sordo, María Cruz Fernández Cebral e Eladio Besteiro Gómez.