Ana Valín presenta en Sarria o seu novo poemario tras gañar o Premio María Mariño
A escritora luguesa Ana Valín García, recoñecida co segundo Premio de Poesía María Mariño en 2024, presentará este venres 7 de novembro ás 19.00 horas no Concello de Sarria o seu novo poemario En las latitudes de un miedo políglota.
A obra, de marcado carácter íntimo, aborda o universo dos temores persoais como consecuencia dunha ruptura emocional que levou á autora a reflexionar sobre a soidade, a crianza dos seus fillos desde unha óptica renovada e a importancia dun empoderamento constante como muller e como nai. Ademais, reivindica a poesía como instrumento sanador e espazo de reafirmación emocional.
O acto desenvolverase na Biblioteca Pública Municipal Camilo Gonsar, e contará coa participación do poeta Roberto do Pacio, quen será o encargado de conducir o encontro. A presentación incluirá tamén unha sesión de recitado, na que Valín compartirá algúns dos versos da súa obra máis recente.