Ángel Tomé foi reelixido como secretario xeral de UGT Lugo
Ángel Tomé foi reelixido como secretario xeral de UGT Lugo na clausura do III Congreso UGT-Lugo, Lemos e Costa Lucense.
Ángel Tomé asumiu a secretaría xeral de UGT Lugo en 2011, liderando a unificación das unións comarcais de Monforte de Lemos e Lugo-Costa Oeste, reforzando a presenza do sindicato na provincia.
A súa xestión tamén se caracterizou por promover mobilizacións históricas, como a manifestación en Sargadelos en 2018, en defensa dos dereitos laborais e contra a persecución sindical.
A súa reelección reflicte o apoio continuado dos afiliados e a confianza na súa capacidade para afrontar os retos laborais presentes e futuros na provincia de Lugo.
O presidente da Deputación de Lugo, José Tomé Roca, felicitou a Tomé pola súa reelección, destacando que "con este novo mandato estou seguro de que seguirás sendo un referente imprescindible para os traballadores e traballadoras da provincia". No acto tamén participou o Secretario Xeral de UGT en Galicia, Cristóbal Medeiros.
José Tomé Roca resaltou a dedicación "incansable" de Ángel Tomé á fronte de UGT Lugo desde 2011, cualificándoa como un exemplo de sindicalismo comprometido coa clase traballadora. Destacou logros como a reforma laboral que reduciu a temporalidade, os aumentos do salario mínimo e os ERTES que protexeron postos de traballo en tempos de crise.
O presidente da Deputación subliñou que "UGT é memoria, pero sobre todo, é futuro. Un futuro que debemos seguir construíndo con forza e determinación, sabendo que cada dereito conquistado foi froito da loita e do esforzo conxunto".