ANPE Lugo reivindica un ensino innovador nas súas xornadas e estrean a súa primeira sede na provincia
ANPE Lugo celebrou os días 17 e 18 de outubro a vixésimo oitava edición das súas Xornadas do Ensino, un encontro xa asentado no calendario educativo galego que volveu reunir a profesorado de distintos niveis para reflexionar sobre metodoloxías creativas, emoción e novas maneiras de ensinar baixo o lema “Por un ensino diferente”. Durante as dúas xornadas, diversos especialistas achegaron as súas visións sobre como transformar a aula a través da experiencia e da innovación.
O primeiro relator foi o mestre e experto en metodoloxías activas Ginés Vázquez Seijas, quen abriu o programa coa intervención “Avións de papel”. Seguidamente, José Iglesias Fernández expuxo o “Proxecto de innovación Fórmula Sim”, unha proposta que combina tecnoloxía, traballo cooperativo e aprendizaxe práctica aplicada á realidade educativa.
Xa o día 18, a orientadora e psicóloga Beatriz Blanco Busto compartiu o seu obradoiro “Aula senso-emocional. Un paseo polos sentidos”, un achegamento á educación desde a percepción e as emocións. A continuación, o presidente nacional, Francisco Venzalá González, realizou unha análise sobre a situación actual do sistema educativo e os retos que ten por diante. O músico e musicólogo Abraham Cupeiro López puxo o broche final cunha viaxe sonora pola historia da humanidade titulada “A odisea de Abraham Cupeiro: do Paleolítico á modernidade, pasando por Hollywood”.
Coincidindo coa celebración destas xornadas, o día 18, ANPE Lugo inaugurou a súa primeira sede en propiedade na provincia, un local de arredor de 150 metros cadrados, amplo, accesible e moi luminoso, situado a pé de rúa. O espazo conta con zonas de atención personalizada ao profesorado, unha sala de reunións e mesmo unha aula destinada á formación, consolidando así o compromiso do sindicato coa defensa dos dereitos docentes e coa mellora da educación pública.
O acto de apertura contou coa presenza do presidente nacional, Francisco José Venzalá González, dos secretarios estatais de Organización e Formación, do presidente autonómico, de representantes provinciais de ANPE Galicia e de antigos presidentes da organización en Lugo. En representación da Xunta asistiu a directora territorial da Consellería de Educación, Ciencia, Universidades e FP en Lugo, Sagrario Sánchez Ramil, quen agradeceu a invitación e destacou a importancia de que o profesorado dispoña dun espazo moderno e funcional. Pola súa parte, a tenente de alcalde do Concello de Lugo, Olga López Racamonde, transmitiu a preocupación da presidenta provincial, Mercedes Martínez Reija, pola saúde cardíaca dos docentes e lembrou a solicitude trasladada ao alcalde para instalar desfibriladores nos centros educativos, unha proposta que —asegurou— o executivo municipal está estudando con interese.
Durante a súa intervención, Mercedes Martínez fixo un breve percorrido pola traxectoria do sindicato na provincia e reivindicou que esta nova sede é o resultado do esforzo conxunto, subliñando que cada afiliado ten nela unha pequena parte. Para pechar o acto, o presidente nacional realizou unha breve intervención antes de descubrir unha placa conmemorativa que permanecerá como recordo para todos os docentes que integran ANPE.
A inauguración tivo un ambiente marcado pola camaradería e a ilusión por esta nova etapa. O encontro concluíu cun momento de conversa distendida e un brindis colectivo para celebrar o inicio desta nova andaina do sindicato na provincia.