Antas de Ulla acende o Nadal cunha tarde de maxia e chocolate
Antas de Ulla prepárase para dar a benvida á época máis máxica do ano cunha tarde de celebración na Praza do Concello. Este sábado 6 de decembro, veciñas e veciños están convidados a participar no acendido das luces de Nadal, un dos momentos máis esperados do calendario festivo.
As actividades comezarán ás 17:30 horas coa actuación do Mago Kiko Pastur, que promete encher de ilusión e sorpresa a pequena e gran audiencia. Á continuación, as persoas asistentes poderán gozar dunha chocolatada con churros totalmente gratuíta, para a cal se poderán retirar tickets ao carón do escenario do mago.
O acto principal será o acendido das luces de Nadal, que marcará oficialmente o inicio dunha temporada chea de espírito festivo. En caso de choiva, todas as actividades trasladaranse á Praza Nova, un espazo cuberto.
A iniciativa busca ser un punto de encontro para compartir, festexar e vivir o Nadal en familia e entre a comunidade, ofrecendo unha oportunidade para desfrutar dunha tarde máxica en Antas de Ulla.