Antas de Ulla celebra o San Xoán presentando ao novo director da Banda de Música

O Concello de Antas de Ulla presenta as festas do San Xoán que comezarán cunha cea popular e contarán con numerosas actuacións musicais.

Antas de Ulla presenta as súas festas na honra de San Xoán. Así este xoves, 23 de xuño, iniciará a celebración ás 21,30 horas cunha cea popular na praza Nova. As entradas pódense adquirir no Restaurante Val por 7 euros, ou nos teléfonos da comisión: 656 935 310, 610 077 618 ou 661 827 958.

Á medianoite será momento do encendido do lume novo e da queimada. Todo, amenizado polo trío Orquídea.

O venres 24 de xuño continúan as festas con pasarrúas ás 11.30 horas a cargo da Banda de Música Municipal de Antas que tamén amenizarán a praza Nova dende as 14.00 horas, despois da misa solemne.

Á noite, ás 22.30 horas, terá lugar o concerto Unha noite especial na praza Nova que servirá como acto de presentación do novo director da Banda de Música Municipal. Tralo concerto, á medianoite, iniciarase a verbena da man da orquestra La Banda de Ayer.