Antas de Ulla prepárase para celebrar as festas da Virxe dos Remedios con música, procesións e verbena
O Concello de Antas de Ulla xa ten listo o programa das festas na honra á Virxe dos Remedios, que se celebrarán os días 8 e 9 de setembro de 2025 cun amplo abano de actividades musicais, relixiosas e lúdicas para todos os públicos.
O luns 8 de setembro, a xornada comezará ás 11:30 horas cun pasarrúas a cargo da Banda de Música de Antas de Ulla, seguido dunha misa solemne e procesión ás 13:00. Xa pola tarde, a música regresará á Praza Nova cun concerto da mesma banda ás 14:00 horas e outra actuación ás 20:00, desta vez compartindo escenario con Emilio Rúa. Os máis pequenos poderán gozar dunha hora infantil con colchonetas de balde entre as 17:30 e as 18:30. Pola noite, a programación trasladarase á Praza do Concello, onde Rosa Cedrón ofrecerá un concerto ás 22:30, ao que seguirá un espectáculo de fogos artificiais ás 23:45 e a actuación de Tiruleque a partir das 00:30 horas.
O martes 9 de setembro será a Asociación Cultural Fiadeira a encargada de abrir a xornada co pasarrúas das 11:30. Ás 12:30 está prevista unha actuación na igrexa da coral polifónica Sons do Farelo, que tamén participará na misa cantada das 13:00 e na posterior procesión. Xa pola tarde, a Praza Nova acollerá diferentes actuacións musicais da Asociación Cultural Fiadeira ás 14:00, 19:00 e 19:30 horas, ademais dunha nova hora infantil con colchonetas ás 17:30. O broche final das festas chegará ás 23:00 na Praza do Concello cunha gran verbena a cargo da orquestra Fania Blanco Show.