Antas de Ulla protagoniza a feira Galicia Pueblo a Pueblo en Sestao
A localidade vasca de Sestao acolle esta fin de semana unha nova edición da feira Galicia Pueblo a Pueblo, un evento que nesta ocasión rende homenaxe ao municipio lucense de Antas de Ulla, escollido como protagonista baixo o lema "Territorio con alma en el Corazón de Galicia". A encargada de inaugurar a celebración foi a alcaldesa, Pilar García Porto, quen asumiu a responsabilidade de ofrecer o pregón de apertura ante numerosos asistentes.
A feira está promovida pola Agrupación Hijos de Galicia Sestao, en colaboración co Concello de Sestao, o de Antas de Ulla e a Secretaría Xeral da Emigración da Xunta de Galicia. O obxectivo principal é dar visibilidade ao patrimonio cultural e gastronómico do municipio homenaxeado, ademais de reforzar a conexión coa diáspora galega establecida na área de Bilbao.
Durante o evento están a promocionarse produtos emblemáticos da comarca, como o pan de Antas, o queixo da Ulloa, os ovos do Pazo de Vilane, mel da zona, cosmética artesanal e os doces tradicionais da Ulloa. A rexedora expresou a súa satisfacción por participar nesta iniciativa, subliñando "a honra que supón dar este pregón e que Antas de Ulla fose elixida para representar a Galicia en Sestao nunha festa con tanto percorrido e repercusión".
García Porto tamén fixo fincapé na importancia deste tipo de encontros como punto de unión coa colectividade emigrada: "Coa nosa presenza nesta feira consolídanse os lazos de hermanamento coa emigración galega e coas súas familias residentes hoxe na zona de Bilbao, sendo tamén un reclamo para que volvan a nosa terra, ben para visitala, ben para permanecer nela".
Entre as actividades previstas, destaca a participación da histórica banda de música de Antas de Ulla, con máis de 125 anos de traxectoria, que representa un dos símbolos máis recoñecibles do municipio. A feira, que deu comezo o venres 4 de xullo, estenderase ata o domingo 6 e contará con propostas como a feira do polbo e da gastronomía, unha mostra de artesanía, espectáculos musicais, catas de viños e pasarrúas.