Antas de Ulla salda a débeda histórica das obras do campo de fútbol
O Concello de Antas de Ulla vén de facer fronte á débeda de 170.000 euros que o anterior goberno municipal deixou pendente coa empresa Galitec polas obras do campo de fútbol realizadas no ano 2019.
A situación, derivada dunha xestión administrativa deficiente, chegou aos xulgados e xerou custes adicionais de preto de 50.000 euros en intereses de demora, unha contía que podería terse destinado a melloras en servizos e infraestruturas para os veciños e veciñas.
A alcaldesa, Pilar García Porto, destacou o esforzo e a responsabilidade coa que se afrontou este compromiso, negociando cada pagamento sen incrementar a carga fiscal da cidadanía. O goberno local priorizou o saneamento das contas municipais e traballou para devolver o prestixio e a estabilidade económica ao Concello.
Grazas á boa xestión e ao apoio da Deputación de Lugo, Antas de Ulla conseguiu saldar por completo a débeda, consolidando un paso importante na recuperación económica do municipio.
O equipo de goberno asegura que seguirá traballando con responsabilidade, transparencia e compromiso para garantir o futuro e a estabilidade financeira de Antas de Ulla.