Aprobada a reprobación de Tomé no Pleno de Lugo cos votos a favor do BNG
O último pleno do ano no Concello de Lugo estivo marcado por un intenso debate político ao redor da moción presentada polo Partido Popular para a reprobación de José Tomé polos casos de presunto acoso sexual. A iniciativa saíu adiante grazas ao apoio do PP e do BNG, mentres que o PSOE votou en contra. Os populares defenderon a proposta como unha resposta institucional necesaria e expresaron o seu respaldo e solidariedade coas denunciantes, reclamando que os feitos se investiguen ata as últimas consecuencias tanto no ámbito xudicial como no político.
Desde o PP criticaron duramente a postura do PSOE por permitir, ao seu xuízo, que Tomei continúe nos seus cargos, o que consideran unha renuncia aos principios que din defender. Tamén emprazaron ao BNG para demostrar se o seu apoio á moción supón un posicionamento claro ao lado das vítimas. Con todo, o BNG, a pesar de votar a favor, acusou ao PP de utilizar un asunto de extrema gravidade con fins partidistas e presentou unha emenda para matizar o texto e aclarar o debate, denunciando a existencia de dobres discursos noutras formacións políticas.
O Grupo Municipal Socialista xustificou o seu voto negativo alegando que a proposición do PP era parcial e selectiva, xa que non condenaba de forma xeral e sen excepcións todas as condutas de acoso sexual e o seu encubrimento. O PSOE explicou que presentou unha emenda para ampliar a reprobación a todos os casos e a todos os cargos públicos, con independencia da súa afiliación política, pero denunciou que o PP rexeitou dita proposta, o que, ao seu xuízo, demostra un uso partidista do asunto.
Ademais deste debate, o pleno aprobou a ordenanza reguladora da Zona de Baixas Emisións, que permitirá controlar os accesos ao centro histórico de Lugo unha vez entren en funcionamento as cámaras de lectura de matrículas, co obxectivo de mellorar a mobilidade e a calidade ambiental no centro urbano. Tamén se alcanzou un novo entendemento entre o PP e o alcalde para recuperar o acordo asinado en 2022 entre o Concello e a Xunta de Galicia para facer realidade o Museo da Romanización.
A sesión abordou igualmente outras cuestións, como a coincidencia parcial entre os grupos sobre a creación dun servizo municipal de limpeza de fosas sépticas no rural, o rexeitamento de PSOE e BNG a desbloquear no Congreso as leis antiocupación aprobadas no Senado e o recoñecemento a Ramón Falcón Rodríguez pola súa contribución á conservación da muralla romana de Lugo. Con todo, non se concretaron avances sobre a reapertura do Centro de Interpretación da Muralla nin sobre a ordenanza de uso do Auditorio Fuxan os Ventos.