Aproban a memoria do proxecto para a creación do Centro de Maiores de Becerreá
A Deputación de Lugo vén de aprobar inicialmente a memoria do proxecto para a creación do Centro de Maiores de Becerreá, que inclúe os aspectos sociais, xurídicos, técnicos e financeiros necesarios para a súa implementación.
Ademais, tamén se aprobou a ordenanza de acceso ao servizo de atención residencial e diúrna, xunto cos regulamentos internos do centro; con votos a favor do PSdeG e BNG, e a abstención do Partido Popular.
O presidente da Deputación de Lugo, José Tomé Roca, subliñou a importancia deste acordo, destacando que se trata dun "paso necesario e obrigatorio para poder abrir o centro". Tomé tamén criticou as actuacións doutras administracións, asegurando que "mentres outros seguen facendo feiras, nós seguimos dando pasos responsables para poñer en servizo esta residencia o antes posible".
Pablo Rivera Capón, deputado de Promoción Económica e Social, detallou que este avance é o resultado do traballo da Comisión de Estudo da Deputación, que elaborou un informe de case 300 páxinas que define o modelo de xestión que garantirá a viabilidade e a calidade do servizo.
Rivera Capón lamentou a abstención do Partido Popular, cualificándoa como un exemplo de "nulo compromiso coas residencias" e criticou a falta de coherencia do PP, que apoiou a creación da Comisión de Estudo e logo non respaldou este paso adiante.
O deputado tamén rexeitou a "inacción doutras administracións implicadas", como a Xunta de Galicia, que, segundo el, non aportou financiamento para a posta en marcha deste centro. "A Deputación de Lugo reafirma o seu compromiso co benestar social e coas persoas maiores da provincia", engadiu.
Pola súa parte, o vicepresidente da Deputación de Lugo, Efrén Castro, explicou que “se trata dunha saída adoptada unicamente para abrir a residencia de Becerreá, un proxecto herdado da xestión do Partido Popular e do alcalde de Becerreá Francisco Martínez que reventaron o modelo de centros de atencion a maiores sostibles da Deputación cun macroedificio, inasumible para unha Deputación do tamaño da de Lugo, sen o apoio da Xunta de Galicia”.
Nese sentido, o responsable provincial remarcou que "o propio informe explica que se trata dunha solución forzada pola falta de apoio da Xunta de Galiza, que non aportou un só euro para a construción ou o mantemento deste residencia, nin de ningunha outra da rede provincial".
Tamén subliñou que o acordo acadado co PSOE para a aprobacion desta proposta blinda o modelo público de residencia da Deputación de Lugo de cara ao futuro.