Arranca a campaña de Nadal na Praza de Abastos e no Mercado Municipal de Quiroga Ballesteros
A concelleira de Participación e Servizos para a Veciñanza, Cristina López, anunciou o inicio da campaña de Nadal na Praza de Abastos e no Mercado Municipal de Quiroga Ballesteros, que se puxo en marcha co acendido das luces de Nadal en ambas instalacións.
A concelleira destacou que “co alumeado de Nadal queremos convidar á veciñanza de Lugo a achegarse á Praza de Abastos e ao Mercado Municipal para coñecer os produtos de primeira calidade que se venden nestas dúas instalacións históricas”.
Cristina López lembrou que todas as persoas que realicen compras por valor de 40 euros ou máis nos distintos postos recibirán un agasallo, e subliñou que “nos últimos anos, os postos da praza facturaron máis de 16.000 euros só o primeiro día desta promoción”. Este ano, a iniciativa desenvolverase os días 22 e 29 de novembro e os días 13, 20 e 27 de decembro.
A área de Participación habilitará un posto durante os días de promoción no horario de apertura da Praza para que as persoas poidan achegar os tiques das súas compras e canxealos polos agasallos dispoñibles, entre os que destacan deseños de bolsas reutilizábeis serigrafadas cos cadros gañadores do certame de Pintura Rápida, así como material promocional da Praza de Abastos e do Mercado Municipal.