Arrancan os traballos de renovación de Luís Seoane, en Lugo
Arrancan os traballos de renovación da rúa Luís Seoane, no barrio lucense da Milagrosa. Un proxecto importante para a “mellora estética do barrio” no que o Goberno local “aposta polo modelo de plataforma única con preferencia peonil, un modelo que está a funcionar noutras cidades e que demostrou a súa viabilidade en rúas estreitas”. Así o explicou o tentente de alcalde, Rubén Arroxo, quen lembrou que outras zonas da cidade como a rúa Sanxillao ou Fingoi de Abaixo xa utilizan este modelo
Os traballos que veñen de comezar teñen un prazo de execución de 5 meses, e supoñen unha inversión de 388.429,75€ para o Goberno de Lugo. Xunto coa transformación da rúa, renovaranse tamén os servizos soterrados, como o alumeado, cuxa instalación se soterrará, e prepararse tamén o sistema de canalizado para facilitar o soterramento das instalacións de electricidade e telefonía. O modelo de Plataforma Única, permitirá gañar espazo para o tránsito peonil, sen afectar á dispoñibilidade de prazas de estacionamento.
Coa renovación do alumeado público avanzarase na implantación de luminarias LED, que contan con consumos inferiores ás luminarias instaladas actualmente, e terán unha tonalidade máis agradable que a actual. Rubén Arroxo explicou que “o novo alumeado mellorará a seguridade da zona, ao contarse cun novo alumeado máis uniforme, ao mesmo tempo que se mellora a estética da zona e se reduce o consumo enerxético”.
A solución que executará o Goberno de Lugo eliminará as barreiras arquitectónicas da rúa, creando unha serie de espazos de relación e descanso que permitirán o desfrute da zona por parte da veciñanza, potenciando o carácter vivo da rúa ao longo do día. Estes espazos de relación dotaranse de mobiliario urbano como bancos e papeleiras, xerando pequenas prazas que favorezan o caracter peonil do conxunto. Ademais, manteranse as árbores existentes na súa posición actual, garantindo zonas de sombra.