Arroxo e Ferreiro supervisan a zona hostaleira de Augas Férreas, onde haberá actividades de San Froilán
O tenente alcalde do Concello de Lugo, Rubén Arroxo, e a concelleira de Cultura, Turismo e Promoción da Lingua, Maite Ferreiro, acudiron ata os locais de hostalería da zona de Augas Férreas. Como cada ano, dende o Goberno, organízanse unha serie de actividades para manter vivos os barrios durante as festas de San Froilán. Concretamente, nesta zona da cidade a área de Cultura colabora coa asociación de hostaleiros para levar ata o barrio unha verbena para encher as rúas nesta edición do San Froilán.
Segundo explicou Rubén Arroxo todos os barrios da cidade son fundamentais, polo que “cada ano traballamos para levar o espírito das nosas festas máis aló do centro de Lugo, para que cada un dos barrios se contaxien deste ambiente festivo que enche a nosa cidade durante os primeiros días de outubro”.
Este ano, indicou Maite Ferreiro, “chegamos máis alá traendo ata Augas Férreas a gravación en directo dun programa de gran éxito entre a sociedade galega como é a Liga dos Cantantes Extraordinarios”. Un formato, explicou Ferreiro “que se adapta a todo tipo de público, polo que se pode desfrutar con familia e amizades, e que promete achegar unha gran afluencia de persoas ata todos os locais do barrio”.
A concelleira de Cultura aclarou que se trata dun “espectáculo híbrido entre festival e verbena, gratuíto e que se gravará pola televisión desde Lugo para a súa posterior emisión nas pantallas de todas as galegas o día 7 de outubro”. “Haberá dúas horas de música con recoñecidas caras da verbena galega que se pechará coa gran actuación da orquestra Cinema”, explicou Ferreiro.
