As alumnas de Tecer para integrar reciben os seus diplomas de formación
Despois de oito meses de formación, as alumnas de Tecer para integrar recibiron onte os diplomas que acreditan a súa participación neste programa formativo, impulsado pola Vicepresidencia da Deputación de Lugo coa colaboración de Federación de Asociacións do Ambito Social FADAS Lugo.
O acto, celebrado na Capela de Santa María, puxo o broche a oito meses de formación en patronaxe, confección e moda sostíbel no que as quince participantes adquiriron os coñecementos necesarios para desenvolverse profesionalmente nos sectores da artesanía e da moda.
O deputado de Artesanía e Deseño Efrén Castro e a Vicepresidencia da Deputación de Lugo Maite Ferreiro, que fixeron a entrega dos diplomas, felicitaron “as participantes polo aproveitamento deste programa integral impulsado coa idea de poñer os recursos e os coñecementos cos que conta o Centro de Artesanía e Deseño para xenerar oportunidades laborais tanto na artesanía como no sector textil”.
Ambos destacaron tamén o enfoque co que foi deseñado o proxecto, “asentado en saberes e coñecementos tradicionais, herdados sobre todo das mulleres, pero buscando actualizalos e demostrando que a artesanía é un actividade produtiva e de futuro” e, nese sentido, “agradeceron a implicación no proxecto de deseñadoras e artesás de Lugo que foron abrindo ese camiño, apostando por pequenas producións coidadas, sostibles, vinculadas ás raíces, que teñen un gran recoñecemento”.