As asociacións veciñais reclaman ao Concello de Lugo a limpeza de leiras abandonadas no Sagrado Corazón
A Asociación Veciñal Porta de Lugo e a Federación de Asociacións de Veciños da Provincia de Lugo Lucus Augusti trasladaron á concellaría de Medio Ambiente a súa preocupación polo estado de abandono de varias leiras situadas no barrio do Sagrado Corazón, nas inmediacións do colexio homónimo.
As entidades achegaron fotografías que acreditan a situación e lembraron que o Concello xa abriu expedientes a propietarios de parcelas privadas da contorna. Con todo, solicitan que se insista e se intensifique o seguimento para garantir que se cumpra coa obriga de manter estes terreos en condicións adecuadas.
Segundo denuncian, a maleza e o descoido destas parcelas supoñen un risco para a seguridade e a salubridade pública, especialmente pola súa proximidade a un centro escolar. Por iso, consideran imprescindible que se adopten as medidas necesarias para que os titulares actúen con dilixencia e responsabilidade.
As asociacións veciñais instan ao Concello de Lugo a continuar coa supervisión e a esixir aos propietarios que manteñan ditos espazos limpos, co obxectivo de evitar perigos derivados do abandono.