As caldas de Lugo volven pechar por presenza de legionela
As instalacións termais do parque do Miño permanecen de novo pechadas tras detectarse legionela nas duchas e tamén nalgúns vasos das piscinas. A bacteria localizouse na mesma zona de tubaxe onde xa aparecera en setembro do pasado ano, o que obrigou a un longo peche ata maio.
Segundo informou o Concello, a alta temperatura da auga do río Miño —que chegou a acadar 25 graos este verán— e a escasa afluencia de usuarios poderían favorecer a proliferación da bacteria, malia os purgados diarios. Os últimos controis amosan unha redución considerable dos niveis de legionela e están a aplicarse os protocolos de desinfección.
Trátase dun problema que tamén afectou recentemente a outras instalacións municipais, como o parque de bombeiros ou o campo de fútbol das Gándaras, aínda que en ningún caso houbo consecuencias para a saúde. O goberno local defende a calidade da auga e o control continuo da rede, mentres o PP insiste en cuestionar os niveis de cloro en determinados puntos.