As Gándaras acolle a sexta edición do Torneo Internacional de Fútbol 7 de Semana Santa
A Agrupación Deportiva Sagrado Corazón organiza a sexta edición do Torneo Internacional de Fútbol 7 de Semana Santa, que se celebrará os días 30 e 31 de marzo nos campos José María Rodríguez Lago, situados nas Gándaras, en Lugo.
A organización prevé a participación de arredor de 700 nenos e nenas distribuídos en 48 equipos pertencentes a 35 clubs diferentes. Entre os conxuntos participantes haberá representación das catro provincias galegas, ademais dun equipo procedente de Madrid e dous do norte de Portugal, o que reforza o carácter internacional do evento.
Como principais novidades desta edición, os promotores salientan que ambas categorías, benxamín e alevín, competirán durante dous días completos, ampliando así o formato habitual. Ademais, a presenza de clubs portugueses consolida a dimensión internacional dunha cita que segue medrando ano tras ano.
O delegado territorial da Xunta en Lugo, Javier Arias, participou na presentación do torneo xunto co presidente da entidade organizadora, Rubén Engroba, e outros representantes. Durante o acto, Arias puxo en valor o traballo que desenvolve o Sagrado Corazón no impulso do deporte base na cidade.
Así mesmo, felicitou á entidade pola consolidación deste torneo, que nesta edición volverá reunir a algunhas das mellores canteiras do fútbol galego, converténdose nun referente destas competicións a nivel autonómico e ampliando a súa proxección fóra de Galicia.