As persoas maiores das Gándaras volven protestar para reclamar intimidade nos seus cuartos
As persoas maiores da residencia de maiores das Gándaras, en Lugo, volveron saír un sábado máis á entrada do centro para expresar o seu malestar pola falta dun espazo íntimo dentro das súas habitacións.
As protestas manteñen o ton reivindicativo das últimas semanas, coincidindo co proceso de remodelación que a Consellería de Política Social está a executar nas instalacións.
As obras previstas inclúen unha reconfiguración dos cuartos que, segundo denuncian as usuarias e usuarios, supón a eliminación da pequena área persoal que cada residente dispoñía ata agora nas habitacións compartidas. Ese recuncho propio lles ofrecía unha mínima privacidade e un ambiente de tranquilidade especialmente necesario para persoas en situación de vulnerabilidade, moitas delas moi sensibles a mudanzas na súa contorna e na súa dinámica diaria. A separación física que existía permitíalles descansar con maior comodidade, ordenar as súas cousas e manter rutinas cotiás —como escoitar a radio, ver a televisión ou ler— sen interferir tanto na vida da compañeira de cuarto.
As persoas residentes critican que a Xunta de Galicia non tivese en conta nin as súas necesidades nin as súas opinións antes de aprobar o proxecto, o que desembocou nas mobilizacións actuais e na presentación dunha petición formal dirixida á Consellería. Nesa solicitude reclaman que se revise o deseño previsto e se modifique a actuación para garantir unha separación permanente entre as camas e os espazos de uso individual dentro das habitacións compartidas. Ao seu xuízo, unha medida deste tipo permitiría que cada persoa conservase o seu propio ámbito, cos seus obxectos e costumes, reducindo molestias mutuas e facendo do centro un lugar máis próximo a un fogar.
As residentes xa adiantaron que o vindeiro sábado 13 de decembro, á mesma hora, volverán mobilizarse para insistir na súa oposición ao proxecto.