As traballadoras do 010 volverán ao traballo nos vindeiros días

As traballadoras do 010 reincorporanse ao Concello retomando as súas funcións de atención telefónica á cidadanía

A Xunta de Goberno Local vén de autorizar esta mañá a readmisión das catro traballadoras do 010 que nos próximos días se reincorporarán ao Concello, retomando as súas funcións de atención telefónica á cidadanía.

A alcaldesa de Lugo, Lara Méndez, xa mantivera un encontro o pasado mes de febreiro con elas para avanzarlles os termos da súa readmisión como persoal laboral indefinido da Administración local, onde exercerán as mesmas funcións que tiñan anteriormente e nas mesmas condicións - en xornada de mañá e tarde - para o que dende a área de Persoal se está xa a elaborar, cumprindo cos prazos legalmente establecidos, unha proposta de modificación puntual da RPT que recolla a existencia das catros prazas.

Tanto a rexedora como a tenenta de alcaldesa e concelleira de Gobernanza, Paula Alvarellos, destacaron o labor desenvolvido por estas catro empregadas ata a finalización da relación contractual que mantiñan coa adxudicataria do servizo e puxeron en valor o seu compromiso e a excelente función que viñan desempeñando como interlocutoras da Institución coa veciñanza de Lugo.