As visitas á depuradora e á potabilizadora de Lugo duplican as do ano pasado
As visitas á Estación de Tratamento de Auga Potable (ETAP) e á Estación Depuradora de Augas Residuais (EDAR) de Lugo xa duplican as do curso pasado, cando o prazo de inscrición segue aberto.
No ano anterior, preto de 800 estudantes acudiron a estas instalacións, mentres que para o presente curso xa están confirmadas 1.680 persoas, entre alumnado e cidadáns.
Este incremento explícase pola ampliación do programa de educación ambiental impulsado polo Concello de Lugo e a empresa concesionaria do servizo. Agora, ademais dos centros educativos, tamén poden participar universitarios, asociacións e colectivos veciñais de toda Galicia. As visitas, iniciadas en marzo, continuarán ata maio e poden solicitarse para grupos de ata 30 persoas.
Concienciación sobre o ciclo da auga
O obxectivo deste programa é achegar á cidadanía a importancia do abastecemento e saneamento da auga, un recurso esencial e limitado. A través destas visitas, os participantes coñecen de primeira man o funcionamento destas infraestruturas modélicas.
Ata o momento, grupos de escolares de primaria e secundaria, estudantes universitarios e asociacións como Alume Saúde Mental xa tiveron a oportunidade de percorrer as instalacións. Ademais, a iniciativa está xerando interese máis alá da provincia, con solicitudes de colexios e facultades de Ourense e Santiago.
Un percorrido polo tratamento da auga
Durante as visitas, os participantes descobren os procesos que permiten que a auga chegue potable aos fogares e como se depura antes de ser devolta ao medio natural.
Na ETAP, o percorrido inicia na captación no río Miño e avanza polas fases de pretratamento, coagualación, floculación, decantación, filtración e desinfección, ata a distribución final.
Na EDAR, explícase o camiño da auga residual desde que sae dos fogares ata a súa depuración final. O percorrido segue as dúmas líneas principais do proceso: a de auga e a de lodos. Tamén se destaca a importancia dos bos hábitos no consumo e coidado da auga para preservar o medio ambiente.
Un proxecto educativo e ambiental de futuro
O programa de visitas forma parte dun proxecto máis amplo de divulgación ambiental que busca inspirar ás novas xeracións no coidado e preservación da auga. Ademais dos aspectos técnicos, as visitas ofrecen unha visión integral que aborda a historia da auga en Lugo, a etnografía, a flora e fauna do río Miño e a importancia de protexer a contorna natural.
A boa acollida do programa e o crecente interés de centros educativos e colectivos sociais reforzan o valor da educación ambiental como ferramenta para fomentar unha xestión sustentable dos recursos hídricos.