ASPALU pon fin aos talleres levados a cabo para mellorar a calidade de vida dos seus pacientes
![Clausura talleres ASPALU](https://lugoxa.com/wp-content/uploads/2021/12/Clausura-talleres-ASPALU.jpg)
O Deputado de Promoción Económica e Social, Pablo Rivera Capón, participou este luns no acto de clausura dos talleres que a Asociación Párkinson de Lugo (ASPALU) organizou en colaboración coa Deputación de Lugo na Casa de Clara Campoamor, no parque da Milagrosa. Esta actividade, destinada a mellorar a calidade de vida dos usuarios e usuarias do colectivo con diferentes actividades, enmarcouse no programa de motivación para a saúde 2021 deseñado por ASPALU e para o que a institución provincial achegou 7.000€ na anualidade 2021.
“Esta é unha acción importante encamiñada a mellorar o benestar e a calidade de vida das persoas que padecen esta enfermidade”, sinalou o responsable provincial, que engadiu que “dende a Deputación de Lugo colaboramos con esta iniciativa porque sabemos da importancia de que estas persoas sigan sendo socialmente activas, algo que contribúe a mellorar o seu estado de ánimo e a súa autoestima”.
Rivera Capón expuxo que “as Políticas Sociais son, desde o inicio do mandato, unha das prioridades do Goberno provincial e o impacto da pandemia fixo que reforzásemos aínda máis esta aposta. Non só mantendo e ampliando a nosa rede de centros de atención a maiores na provincia e colaborando coa prestación de servizos básicos como a Teleasistencia ou a Axuda no Fogar; tamén apoiando, como é este caso, ao asociacionismo da provincia para que poida desenvolver as súas propias iniciativas”.
O Deputado tamén puxo en valor e agradeceu o labor que ASPALU vén desenvolvendo na provincia de Lugo dende o ano 2008.
O Programa Motivación para a Saúde na Enfermidade de Parkinson 2021 ten como obxectivo mellorar o aspecto psicolóxico, podolóxico e de logopedia dos e das pacientes. Os talleres de cestería, manualidades e costura ou lectura comprensiva que se clausuraron este luns desenvolvéronse ao longo dos meses de outubro, novembro e decembro deste ano.