Atrásanse as obras de peonalización nas rúas Montevideo e Bolaño Rivadeneira
As obras de peonalización que se están a levar a cabo no marco do Proxecto Corazón Verde volven a atrasarse ao conceder, o Concello de Lugo, unha ampliación de 38 días laborais.
Esta obra afecta a un treito clave do Centro Histórico da cidade, comprendido entre a porta da Muralla de Bispo Odoario e a Praza de Ferrol, concretamente nas obras de peonalización e humanización das rúas Montevideo e Bolaño Rivadeneira.
A decisión foi adoptada despois de que a empresa encargada do proxecto, Xestión Ambiental de Contratas, presentase unha solicitude explicando os motivos que influíron no retraso dos traballos.
Segundo a empresa, a aparición de restos arqueolóxicos na rúa Bolaño Rivadeneira e as inclemencias meteorolóxicas, especialmente episodios de choiva, afectaron directamente á execución das labores de pavimentación e, en menor medida, ás de movemento de terras. Estas condicións obrigaron a suspender algúns xiros de traballo dentro do prazo inicialmente previsto.
Despois de estudar a solicitude, os técnicos municipais consideraron que os motivos expostos afectan ao cronograma de traballo e, por iso, decidiron autorizar a prórroga. A nova data límite para a finalización das obras será o próximo 6 de maio.