Auxilia Lugo celebrou o seu primeiro encontro de Pascua con participación artística e convivencia
Auxilia Lugo celebrou o seu primeiro encontro de Pascua, unha iniciativa que reuniu usuarios, usuarias e colaboradores nun ambiente de convivencia e participación.
Nesta ocasión, a entidade contou coa colaboración do artista Diego As, quen explicou o proceso creativo dos seus murais, así como o traballo e as horas de dedicación que hai detrás de cada unha das súas obras, achegando aos asistentes unha visión máis próxima do seu labor artístico.
Unha vez rematada a súa intervención, os participantes gozaron dunha merenda composta por doces, que contou coa colaboración da Xunta de Galicia a través do Xacobeo 2027 e da Área de Xefatura Territorial. Estes foron acompañados de cafés e infusións ofrecidos pola colaboradora Ana Fernández López.
O encontro contou tamén coa implicación activa dos propios usuarios e usuarias, que contribuíron a crear un ambiente de boa compañía e convivencia durante toda a tarde.
Dende o Consello Directivo e o conxunto de participantes trasladaron o seu agradecemento a todas as persoas e entidades colaboradoras por facer posible esta iniciativa.