Avanza a instalación do novo videomarcador do Pazo coa finalización da primeira fase
A instalación do novo videomarcador no Pazo dos Deportes de Riazor completou a súa primeira fase, nun proceso que permitirá modernizar de maneira significativa o equipamento audiovisual do recinto.
Esta etapa incluíu o paso de cables desde a sala de control ata as canastras, o posto de consolas e o “cubo central”, así como as acometidas de potencia e datos necesarias para o funcionamento do sistema. Ademais, realizouse o izado da subestrutura que soportará o videomarcador e púxose en marcha a monitorización técnica.
A actuación máis visible desta fase foi precisamente o levantamento da estrutura, executado onte a última hora da tarde.
Segundo o plan de traballo establecido, a segunda fase desenvolverase entre os días 12 e 14 de marzo. Nese período abordarase a montaxe dos módulos do videomarcador, formado por un prisma rectangular LED de 50 metros cadrados con esquinas curvas, complementado por un anel LED inferior de 8 metros cadrados coa mesma forma.