A autovía de Lugo a Santiago estará lista en 2025, según o Goberno
O secretario de Estado de Transportes e Mobilidade Sostible, José Antonio Santano, visitou as obras que están a piques de finalizar no viaduto sobre o río Pambre en Palas de Rei, pertencente ao tramo Palas de Rei-Melide da autovía entre Lugo e Santiago (A-54); e que discorre polos termos municipais de Palas de Rei na provincia de Lugo e Melide e Santiso na provincia da Coruña.
Santano destacou a relevancia desta actuación que fará que a autovía A-54 se converta nun eixo de gran importancia para a vertebración da Galicia interior e permitirá unir Lugo con Santiago de Compostela mediante unha vía de alta capacidade, mellorando a seguridade, comodidade e tempos de percorrido dos tráficos de longo, medio e curto percorrido. Ademais, manifestou que unha vez finalizada reducirá os 100 minutos actuais do traxecto a través do itinerario da N-547, ou os 85 minutos actuais do traxecto polo itinerario da A-6 e N-634, ata aproximadamente 50 minutos percorrendo o novo trazado da A-54.
Ademais, lembrou que o tramo de autovía Palas de Rei – Melide, que está previsto finalizar a finais do presente ano, cun investimento superior aos 90 millóns de euros; discorre ao sur da estrada N-547, cun trazado sensiblemente paralelo a ela. A nova autovía permitirá ademais mellorar sensiblemente a seguridade viaria da actual N-547, tanto rodada como peonil, onde actualmente hai importantes tránsitos de peregrinos do Camiño de Santiago, eliminándose ademais a travesía de Melide.
O presidente da Deputación de Lugo, José Tomé Roca, valorou os avances. “Estamos comprobando como avanzan as obras da autovía entre Lugo e Santiago nun tramo que é tremendamente complicado e que tivo moitas dificultades para poderse levar a cabo”, destacou o Presidente. Sinalou que, tal e como avanzou Santano, permitirá ter a infraestrutura lista e o treito entre Palas de Rei e Melide en circulación a finais de ano, “algo de moita transcendencia a nivel turístico e comercial”. Quedando só o treito entre Arzúa e Melide, “que estará listo a finais do 2025. Son moi boas noticias para a provincia de Lugo porque teremos a capital de Galicia a menos dunha hora”, sinalou Tomé Roca.
Este treito, que conta cun investimento superior a 90M euros, discorre paralelo á estrada N-547, o que mellorará tamén a seguridade desta, que actualmente conta cun importante tránsito de peregrinos do Camiño de Santiago. Así, culmínase por completo a autovía A-54 entre Lugo e Santiago, onde unha vez finalizadas as obras investíronse máis de 700 millóns de euros, con 93,42 quilómetros de nova autovía. Respecto ao viaduto sobre o río Pambre, que permitirá o paso da autovía A-54 sobre o citado río, Santano quixo destacado a singularidade estrutural e construtiva do van principal do viaduto sobre o río, de 87 metros de lonxitude, que require duns medios altamente especializados e procedementos construtivos innovadores con obxecto de materializar un viaduto de taboleiro único de 977 metros de lonxitude que se converterá no viaduto de estrada máis longo da provincia de Lugo.