Avanzan os traballos para a construcción do primeiro Ecoparque urbano de Lugo
![Ecoparque Lugo 2](https://lugoxa.com/wp-content/uploads/2023/08/Ecoparque-Lugo-2.jpg)
Avanzan os traballos de remodelación integral da céntrica área de xogos na Praza do Campo que proximamente contará co primeiro Ecoparque urbano da cidade.
Méndez, lembrou que a intervención “ten por obxectivo crear un novo espazo de lecer aberto e integrador que favoreza a convivencia en harmonía coa contorna na que se atopa, mediante unha solución arquitectónica que adaptará o espazo para o goce das familias e do conxunto da cidadanía, rompendo co concepto de parque pechado que existe agora”.
Asi, a reforma posibilitará realizar unha transición serena da renovada dotación pública cara a Praza Maior e o Concello, respectando os condicionantes da súa localización e mellorando a estética da zona PEPRI.
A rexedora fixo fincapé nalgúns dos aspectos da obra que se centrarán en outorgarlle unha identidade propia ao novo parque.
“Combinará o ecodeseño do que sería puramente unha instalación infantil con outros recursos urbanos, de esparexemento, visuais e paisaxísticos que axudarán a resolver os límites espaciais do recinto coma se estes foran unha extensión cara a Casa Consistorial e a Praza Maior – subliñou – ao tempo que ampliaremos o recinto en máis 70 m², incrementando a súa funcionalidade dende un punto de vista inclusivo”.
Nestes sentido, as escaleiras serán substituídas por ramplas, e os cerramentos, tanto deste parque como do recinto infantil próximo, serán moito menos invasivos adoptando unha configuración de murete revestido simulando madeira, que exercerá de banco para favorecer a socialización.
A accesibilidade e a sostibilidade serán as dúas premisas transversais da actuación, xa que todo o mobiliario procede da reciclaxe de plásticos e terá certificado de baixa pegada de carbono, cumprindo así os obxectivos de desenvolvemento sustentable da Axenda 2030.
“Todos os xogos e mobiliario da área infantil de Campo Castelo contará cos selos ‘Made Green’: produtos feitos a base de materiais reciclados post-consumo (como residuos recuperados do océano, téxtiles usados, envases alimentarios, etc.) que supoñen unha redución de aproximadamente o 50 % das emisións de carbono en comparación con produtos tradicionais elaborados a partir de fontes virxes. E tamén do selo ‘Born Green’, que obteñen aqueles produtos feitos do propio material de construción da natureza como a madeira, procedente de silvicultura sostible e, por tanto, pouco contaminantes”, aclarou.
A rexedora tamén anuniou que tratará de darlle cabida á petición das e dos usuarios máis pequenos de manter o gran columpio que había no parque, incorporando, deste xeito, na medida do posible, como xa fai no resto de proxectos que hai en marcha no municipio, as suxestións da cidadanía.
Igualmente, todo o recinto disporá dun pavimento de caucho continuo, con revestimento decorativo, respectuoso co medio ambiente e con propiedades antiescorregadizas e outras caranterísticas técnicas que garanten unha longa durabilidade e boa resposta ao uso á intemperie.
En canto ao mobiliario urbano, o espazo contará con papeleiras elaboradas con residuos que de forma cotiá se desbotan ao lixo. Ademais, recolocaranse as arquetas existentes e se incrementará a iluminación para aumentar a súa versatilidade no inverno, substituíndo os dous farois por outros tres de maior eficiencia enerxética, en consonancia co resto de actuacións que o Executivo de Lara Méndez levando a cabo nos diferentes barrios da cidade en prol da súa humanización.
Os labores, orzamentados en 312.748 euros terán un prazo de execución de 5 meses.
![Ecoparque Lugo](https://lugoxa.com/wp-content/uploads/thumbs/2023/08/Ecoparque-Lugo--200x104.jpg)