Avánzase na creación dun aparcadoiro vixiado para camións nas Gándaras
O alcalde de Lugo, Miguel Fernández, e o seu equipo mantiveron unha reunión de traballo cos representantes das principais asociacións do transporte da provincia, Tradime e Aetram, para avanzar na creación dun aparcadoiro vixiado para camións no entorno do parque empresarial e do polígono das Gándaras.
Durante a reunión, Miguel Fernández destacou que este proxecto, que dá continuidade ás reunións previas mantidas pola rexedora Paula Alvarellos cos representantes de Tradime e Aetram, é unha prioridade para o Goberno local.
“Seguimos traballando para que Lugo dispoña dunha infraestrutura necesaria para mellorar a seguridade, a mobilidade e a conciliación das persoas transportistas”, afirmou Fernández. O alcalde subliñou que este aparcadoiro vixiado responde a unha necesidade histórica do sector, que demanda un espazo seguro e acondicionado para o estacionamento dos camións, especialmente no contexto da actividade industrial da cidade.
Fernández engadiu que o proxecto tamén se está a seguir de cerca por parte do Goberno local, facendo especial fincapé na súa importancia estratéxica para o funcionamento do tecido industrial de Lugo. “Estamos a insistir na necesidade deste aparcadoiro diante da Xunta de Galicia para que se execute canto antes”, explicou o alcalde.
O novo aparcadoiro, que se proxecta no entorno das Gándaras, será un espazo accesible, seguro e adaptado ás necesidades reais dos profesionais do transporte, mellorando tanto a seguridade como a operatividade do sector. “Lugo necesita un espazo adecuado para os transportistas, que tamén mellore a mobilidade e a seguridade nas nosas infraestruturas”, concluíu Miguel Fernández.