Baralla acolle o 11 de abril a presentación do cómic sobre a primeira guía do Camiño de Santiago
O Centro Sociocultural de Baralla será o escenario, o vindeiro 11 de abril ás 20:00 horas, da presentación do cómic Polvo, barro y fe: Hermann Künig. La primera guía del Camino de Santiago, unha obra que afonda na historia da primeira guía coñecida da ruta xacobea.
O evento combinará a presentación da publicación coa proxección dun documental e un coloquio posterior no que participarán Miguel Fernández e Javier Gómez, vinculados a este proxecto cultural. A proposta busca achegar ao público a relevancia histórica de Hermann Künig, autor da primeira guía impresa do Camiño de Santiago no século XV, e reivindicar o valor patrimonial e cultural desta ruta.
A iniciativa insírese nun formato divulgativo que mestura o relato gráfico co audiovisual, permitindo ofrecer unha visión accesible e atractiva sobre a orixe das guías de peregrinación e o contexto histórico no que xurdiron.