Baralla acollerá a presentación da novela ‘As tres esposas’ de José Estevez o 8 de maio
O Centro Social de Baralla será o escenario o vindeiro 8 de maio ás 20:30 horas da presentación da novela As tres esposas, obra de José Estevez. O acto reunirá diferentes voces vinculadas á vida institucional e cultural do municipio, nun encontro aberto á veciñanza.
Na presentación intervirán o alcalde de Baralla, Miguel González; o prologuista da obra, Manuel Vázquez; e o xuíz de paz da localidade, Camilo Lombardía. Ademais, o evento contará cunha actuación musical a cargo do grupo Airiños do Neira, que porá o acompañamento artístico á cita literaria.
Durante o acto, as persoas asistentes recibirán exemplares gratuítos da novela, nunha iniciativa que busca fomentar a lectura e achegar a obra ao público local.
A publicación está marcada por un forte compoñente emocional, xa que o autor dedica o libro a numerosas persoas falecidas coas que compartiu etapa vital en Baralla, especialmente durante os máis de dez anos nos que exerceu como secretario do Concello. Entre elas, menciona figuras coñecidas da vida social e institucional, así como amizades persoais, ás que rende unha homenaxe a través destas páxinas.
O escritor tamén expresa o seu recordo para outras moitas persoas que non puido incluír explicitamente na obra, ás que pide desculpas e ás que manifesta igualmente o seu respecto e consideración, subliñando así o carácter memorialístico e íntimo da novela.