Besteiro celebrou a inauguración do novo Auditorio de Lugo Fuxan os Ventos
O secretario xeral dos socialistas galegos, José Ramón Gómez Besteiro, celebrou a inauguración do novo Auditorio de Lugo, o Fuxan os Ventos, "unha infraestrutura de gran relevancia para a cidade e unha demanda histórica da veciñanza lucense que, grazas ao compromiso e á xestión dos gobernos socialistas, é hoxe unha realidade", sostivo.
“O novo Auditorio representa o esforzo conxunto por facer de Lugo unha cidade moderna, sostible e amable coa cidadanía. Este proxecto, que se iniciou baixo a xestión do alcalde José López Orozco, e no que tiven o pracer de colaborar, foi continuado pola alcaldesa Lara Méndez, e agora será inaugurado por Paula Alvarellos", sinalou Besteiro.
Lembrou o secretario xeral dos socialistas que: “Esta infraestrutura desenvolveuse con moitos atrasos porque, tristemente, e sabémolo ben, é un exemplo das trabas permanentes da Xunta do PP aos gobernos progresistas de Lugo para que avancen os grandes temas da cidade, atrasos e bloqueos e mala xestión que repercute directamente na cidadanía”.
O Auditorio, unha infraestrutura cultural moderna e polivalente, "situarase como un referente para a dinamización cultural da cidade e un punto de encontro para a creación artística, tanto a nivel local como provincial".
Besteiro quixo destacar o papel da cultura como motor de desenvolvemento social e económico: “Con este auditorio, Lugo non só gaña un espazo de referencia cultural, senón que tamén impulsa un modelo de cidade máis participativa, inclusiva e atractiva”.
Finalmente, Besteiro quixo lembrar que o novo Auditorio é só un exemplo máis das numerosas infraestruturas e proxectos impulsados por gobernos socialistas para transformar Lugo e facelo unha cidade máis habitable, sostible e preparada para os retos do futuro.
“A nosa folla de ruta é clara: apostar polo progreso e benestar da cidadanía, con proxectos que melloren a calidade de vida e que fagan de Lugo a cidade que todos e todas desexamos. O Fuxan os Ventos abrirá as súa portas mañá, marcando un fito histórico para a cidade e consolidando Lugo como un exemplo de xestión socialista eficaz e comprometida coas necesidades reais da xente”, concluíu.