Bos resultados para o Club Escola Lucense de Tiro con Arco na segunda xornada da Liga Galega en sala
O Club Escola Lucense de Tiro con Arco volveu demostrar o seu bo momento deportivo esta fin de semana no pavillón municipal de Meis, en Pontevedra, durante a segunda xornada da Liga Galega de Tiro con Arco en sala, puntuable para o RAUS nacional. Igual que na primeira cita da tempada, o club lucense desprazou unha ampla representación de arqueiros e arqueiras, que volveron acadar resultados salientables en distintas categorías.
Na modalidade Tradicional Sénior masculino, Marcos Hermida Carrera rematou no 15º posto cun total de 380 puntos. Pola súa banda, na categoría Tradicional +50 masculino, Fon Villamiel impúxose con autoridade ao lograr 530 puntos, mentres que o seu compañeiro José Barreiro López obtivo a 10ª posición con 441 puntos. Tamén houbo triunfo para a entidade lucense en Longbow +50 masculino, onde José A. Otero Martínez proclamouse vencedor cunha puntuación de 490 puntos.
Nos niveis de formación, o mozo Áxel Fernández Arias finalizou sétimo en Recurvo Alevín masculino despois de sumar 423 puntos. Xa na categoría Recurvo Sénior masculino, Juan Andrés Casaleiro Piña acadou a 7ª praza con 513 puntos, e Juan Carlos Fernández Villar situouse no posto 23 con 312 puntos. En Recurvo Sénior feminino, Ana Isabel Villar Fernández terminou no 9º lugar con 384 puntos e Celia Sánchez Mateos foi 11ª con 300 puntos.
Tras estes resultados, os deportistas do club lucense José Ángel Otero e Fon Villamiel continúan liderando as súas respectivas categorías na clasificación provisional da Liga Galega de Tiro con Arco en sala, consolidando o papel destacado da entidade nun comezo de competición moi positivo.