Caamaño subliñou que o Laboratorio de Saúde Pública de Galicia en Lugo "é un referente a nivel nacional"
O conselleiro de Sanidade, Antonio Gómez Caamaño, realizou unha visita ao Laboratorio de Saúde Pública de Galicia en Lugo, onde destacou a súa importante labor na protección sanitaria. O pasado ano, o laboratorio levou a cabo a análise de máis de 15.000 mostras, das que un 60 % foron relativas á seguridade alimentaria.
Na súa visita, o titular da carteira sanitaria estivo acompañado polo delegado territorial da Xunta en Lugo, Javier Arias; a directora xeral de Saúde Pública, Carmen Durán; e o xerente da área sanitaria, Ramón Ares.
Caamaño subliñou que este laboratorio é un referente a nivel nacional na área da saúde pública, sendo o principal centro de operacións desde o que se protexe a saúde da cidadanía galega nas áreas da seguridade alimentaria e ambiental.
O conselleiro tamén resaltou que a Xunta decidiu apostar por Lugo como sede para esta infraestrutura, tras realizar un investimento próximo aos 5 millóns de euros no laboratorio provincial.
Este investimento permitiu multiplicar a súa capacidade analítica, converténdoo no Laboratorio de Saúde Pública de Galicia, cunha finalidade clara: mellorar a protección da saúde da poboación.
Tal como explicou o conselleiro, a Xunta continúa a mellorar os servizos ofrecidos polo laboratorio, integrando novas unidades analíticas, como a detección da triquina nos matadoiros, e consolidándose como un centro de referencia en Galicia para as análises do Plan Nacional de investigación de Residuos en produtos de orixe animal.