Cancelado o concerto programado para as 13.00 horas na praza da Mosqueira polo San Froilán

Toman esta decisión desde a organización do San Froilán debido ás condicións metereolóxicas adversas

Desde a organización do San Froilán de Lugo 2024 veñen de informar de que o concerto da Banda Filharmónica de Lugo e a Banda de Vilalba, programado para este mediodía, ás 13.00 horas, na praza da Mosqueira queda cancelado.

Este terceiro encontro de bandas dentro do marco das actividades programadas polo San Froilán vén de ser anulado debido ás condicións metereolóxicas adversas que está a vivir a cidade amurallada.

A previsión metereolóxica non augura cambios a mellor, polo que todo apunta a que o ceo que recobre a cidade vai seguir durante a tarde cuberto por chuvias, polo que non se descartan máis cancelacións.