Castrexos e romanos chegan a Madrid
As tropas romanas e castrexas de Lugo conquistaron este sábado a capital de España. Unha comitiva, formada por preto de 150 integrantes das asociacións do Arde Lvcvs e presidida pola alcaldesa, Lara Méndez, percorreou as rúas máis céntricas de Madrid para dar a coñecer e multiplicar a difusión desta cita de recreación histórica que celebrará, do 22 ao 25 de xuño, a súa vixésimo segunda edición.
No desfile, que forma parte da campaña de promoción turística de Lugo en Fitur, participaron membros de 12 asociacións do Arde Lucus, en concreto de: Cohors III lucensium, Lucus Equites, Salesianos Lucus Augusti, Lucus Icenas Miliatore, Senatus Lucus Augusti, Asemblearias de Lucus Augusti, Mercenarios Galaicos, Kertix, Ara Roma, Guardia Pretoriana, Lugdunum, e Trebas Galaicas.
A comitiva saíu ás 17:30 horas da Praza de Oriente para continuar pola rúa Maior, Praza Maior, Porta do Sol, rúa Arenal, para volver de novo ata a Praza de Oriente.
A través desta acción de street marketing, o Concello promove a expansión nacional e internacional do Arde Lvcvs, levando unha pequena mostra do que é a festa ás zonas con maior tránsito e volume de turistas da capital española.
Así mesmo, a inciativa tamén tivo unha gran repercusión mediática, acaparando titulares de prensa en medios nacionais e autonómicos de Madrid.