Castro de Rei abre unha mostra de fotografías antigas achegadas polos veciños
O Campo da Feira de Castro de Rei acolle ata o 31 de xullo a exposición fotográfica Os recordos dunha vila e a súa contorna, un proxecto impulsado por Laura Díaz Fernández que busca revivir a memoria colectiva da vila a través de imaxes antigas cedidas polos propios veciños. A mostra recolle escenas cotiás, retratos familiares e momentos históricos que forman parte da identidade do municipio e do seu entorno, permitindo así unha viaxe emocional ao pasado.
Esta iniciativa é posible grazas á colaboración cidadá, pois numerosos veciños achegaron as súas fotografías familiares para construír esta crónica visual compartida. A exposición non só pretende preservar a memoria gráfica do territorio, senón tamén poñer en valor o papel da comunidade como gardiá do patrimonio inmaterial.
Ademais, a mostra constitúe unha homenaxe a Adolfo Bouso Valentín, veciño da Azúmara e recoñecido impulsor da Festa da Malla, así como mineiro comprometido coa súa terra. O proxecto conta co apoio de entidades locais como Amigas da Feira de Castro de Rei e a fundación cultural Antigua Fonda.
A exposición pode visitarse de balde e está acompañada de información adicional dispoñible a través do correo electrónico recordosdeunhavila@gmail.com ou da conta de Instagram @osrecordosdeunhavila.