Castro de Rei contará co seu primeiro concurso de escaparates de Nadal
O Concello de Castro de Rei vén de anunciar a convocatoria do seu primeiro Concurso de Escaparates de Nadal, unha iniciativa impulsada pola Concellería de Infraestruturas e Comercio coa que se busca fomentar o ambiente festivo e dar maior visibilidade ao tecido comercial do municipio. O certame está aberto a todos os establecementos de Castro de Rei e pretende que as rúas luzan unha decoración especial durante as festas.
Os comercios interesados en participar poderán inscribirse ata o 15 de decembro, enviando a folla de inscrición cuberta e unha fotografía do escaparate ao correo electrónico municipal. As imaxes recibidas serán difundidas a través das redes sociais do Concello, co obxectivo de promocionar a creatividade e o esforzo dos participantes.
O concurso establece tres premios, dotados con 500, 300 e 180 euros respectivamente. Os escaparates deberán permanecer decorados entre o 12 de decembro e o 7 de xaneiro, contar cunha temática claramente navideña, estar iluminados, identificarse como participantes e ser accesibles para a súa avaliación.
O xurado, composto por ata tres persoas, valorará aspectos como a orixinalidade, creatividade, dedicación, tradición, deseño, coherencia coa actividade comercial e atractivo visual. A identidade das persoas que o integran e o ditame final faranse públicos na páxina web e nas redes sociais municipais. Desde o Concello animan a todos os comercios a sumarse a esta iniciativa para encher Castro de Rei dun ambiente nadalío único.